Til frama fyri fjølbroyttari avgerðum: Sama hvørja ideologi tú hevur, er ein atkvøða á eina kvinnu eisini ein atkvøða fyri einum styrktum og fjølbroyttum fólkaræði. Tá eitt mál skal loysast, verður úrslitið ofta betri, um ymisleikin er stórur rundan um borðið, har málið verður loyst. Ein politisk avgerð skal helst taka støði í einari røð av sjónarhornum og lívsroyndum. Sita ov fáar kvinnur í stjórnini, vantar eitt sera týdningarmikið sjónarhorn, sum kann tryggja, at rætta avgerðin verður tikin til frama fyri allar partar.

Javnstøða: Í einum fólkaræði eiga øll sama rætt at sleppa til orðanna og taka avgerðir. Tí er tað so týdningarmikið at økja um talið av valdum kvinnum. Soleiðis tryggja vit eitt meira spennandi samstarv, har fólk kunnu arbeiða saman um at taka avgerðir í politikki. Og við at velja fleiri kvinnur í løgting og kommunur, vísa vit á, at tað er púra natúrligt at kvinnur taka lut í politiskum avgerðum á jøvnum føti við menn.

Fyrimyndir: Við at velja fleiri kvinnur, tryggja vit okkum, at tað kenst púra natúrligt at kvinnur eru politikarar. At tær megna at taka avgerðir í politikki. Vit hava longu nú nógvar kvinnuligar fyrimyndir at spegla okkum í, men okkum tørvar enn fleiri. Til hetta er neyðugt, at fleiri okkara velja eina kvinnu, tá val er.

Hví ikki?! Lukkutíð vita tey flestu okkara av, at kvinnur eru eins væl skikkaðar at stýra sum menn. Men hetta merkir ikki, at kvinnur og menn hava eins góðar møguleikar, tá tað snýr seg um at luttaka í politikki. Kvinnur, sum stilla upp, eru færri í tali, og tí er tað eitt gott hugskot at kanna, hvørjar kvinnur best umboða tíni sjónarmið.