Valevni
Aftur

Rúna Sivertsen

Rúna er 67 ára gomul og hevur verið virkin í politikki síðan ár 1990. Hon er útbúgvin sosialráðgevi og starvast hjá Barnaverndartænastuni í Tórshavnar Kommunu.

Rúna stillaði upp á fyrsta sinni í ár 1994 og sat á tingi frá ár 1996 til ár 2002. Hon er gift við Birgiri Sivertsen, og eru tey búsitandi í Ánunum, Klaksvík. Tey eiga fimm børn og 10 barnabørn.


Eg vil arbeiða fyri at leingja um barsilstíðina, men tað skal vera upp til familjuna at gera av, hvussu barsilstíðin verður nýtt. Foreldur, sum fáa tvíburðar, skulu hava møguleika at fáa tvífaldaða barsilstíð.

Ein donsk kanning, sum varð almannakunngjørd í juli í ár, vísir, at tað í longdini hevur gagnað trivnaðinum hjá teimum børnum, hvørs foreldur hava havt tey longur heima. Tað vísir seg, at tá tey koma í ungdómsárini, eru tey meira sjálvsagað, kensluliga tryggari og hava minni fráveru í skúlanum. Í heila tikið vísa tey seg at trívast týðandi betri.

Foreldur avgera nýtsluna av barsilstíðini

Foreldur skulu sjálv gera av, hvussu barsilstíðin verður nýtt. Sum samfelag mugu vit hava tað álit á foreldrunum, at tey í felag kunnu gera av, hvussu tey leggja til rættis umstøðurnar í familjuni til frama fyri barnið og framtíð tess. Hvørki politikarar, ella nakar annar, skal gera av, um tað skal vera mamman ella pápin, ið hevur serstakan rætt til ávíst tíðarskeið saman við barninum.

Royndir frá Noregi og Svøríki vísa, at ein munandi størri partur av familjum ikki nýttu oyramerkt barnsburðarfarloyvi, tí tann fíggjarligi parturin ikki var lokkandi. Í veruleikanum merkti tað, at samlaða barsilstíðin gjørdist styttri. Tað kann hava neiligar avleiðingar fyri børnini.

Umframt, at longd barsilstíð hevði gagnað børnunum, hevði tað eisini minkað um trýstið á ansingarstovnarnar.